Yurtimizda Mustaqillik bayrami arafasida yangi ijtimoiy soha obyektlarini foydalanishga topshirish ezgu anʼanaga aylangan. Ushbu ezgu qadriyatning amaliy davomiyligi sifatida Kitob tumanida ham bir qator muassasalar va tadbirkorlik subyektlari o‘z faoliyatini boshlamoqda.

Xususan, tumanning “Hoji” mahalla fuqarolar yig‘ini hududida 3 mingdan ortiq aholiga xizmat ko‘rsatadigan 12-sonli oilaviy poliklinika foydalanishga topshirildi.

Yangi tibbiyot maskani aholiga zamonaviy diagnostika, profilaktika va davolash xizmatlarini ko‘rsatish imkonini beradi. Shuningdek, mahalliy aholi endilikda uzoq masofalarga qatnash zaruratidan xalos bo‘lib, o‘z hududining o‘zida sifatli tibbiy xizmatlardan foydalanish imkoniga ega bo‘ladi.

Ochilish tadbirida tuman hokimi Rustam Gafurov, tuman prokurori Xurshid Bahromov, tibbiyot xodimlari, mahalla faollari va nuroniylar ishtirok etdilar. Tadbir davomida so‘zga chiqqanlar ushbu poliklinikaning aholi salomatligini mustahkamlashdagi o‘rni, yaratilgan sharoit va imkoniyatlar haqida fikr bildirishdi.

✨ Mustaqilligimizning 34 yillik bayrami arafasida foydalanishga topshirilgan ushbu yangi maskan tumandagi ijtimoiy sohalarni rivojlantirish yo‘lidagi yana bir muhim qadamlardan biridir.